مرت لي بإجتهادي بيت فـالساحة
اللي على العز يا أهل العـز مبنيـه
- بيت يحمل التحدي ...... صح ؟
هو حقيقة أكثر من تحدي ... وأحس بقربه مني كثير ..
- أين أنت ِ من الساحة في الفترة الماضية ؟
ظروف شخصية .. إضافة إلى دراستي التي تجبرني على إعادة الأوراق..
- بصراحة ... هل هذا النص بالتحديد يمثل برديس خليفة ؟
نعم, بكل ما يحمل من حرف ... أكيد يمثلني وهو الأقرب في هذه الفترة ..
- ماذا تقولين لقراءك في أنهآر حاليا ً ؟
أنتم رأس مال الشعر .. وأنتم الكل في الكل واتمنى أن أجد القبول منكم ..
على عهود البحر والشعر وأفراحـه
والجود والنود والنورس وطاريّـه
جيتك ونسمات صبحك حيل مزاحـه
وأنا بطبعـي رقيقـة دوم عفويـه
عمرت لي بإجتهادي بيت فـالساحة
اللي على العز يا أهل العـز مبنيـه
جيتك بشعر النسا والعلم وسلاحـه
احساس صادق مشاعر نابعة فيّـه
في رحلتي للثقافة صـرت ملاّحـة
أصارع أمواج فكري مثـل حوريـه
طاير شعوري معي ومرفرف جْناحه
يخطف شعاع النجوم ويشتعل ضيّه
هايض شعوري حماس وهبت رْياحه
يهـب مـن دار زايـد للسعوديـه
يبحر بشط الكويت بعقل و رْجاحـه
ويعانق جبال مسقـط والوضيحيـه
يفرح بنور المنامه وتشهد أفراحـه
والدوحة اللي بثوب العـز مكسيّـة
سيفي يماني عريق الدم وفْصاحـه
بنت الجزيـرة ويكفينـي جنوبيـة
الله وأكبر شعـار ٍ يرفـع صْياحـه
بغداد أمـي وأنـا لبغـداد نشميـة
مهما تدفق نزيف الشعب وجْراحـه
ما يموت شعب ٍ أسد يريـد حريـه
الى متى يا عرب وأحزان صيّاحـه
والقدس تبغي مواقف صدق جديـه
والحال ينطر فرج بيديـه مسباحـه
والوحده صارت لنا احـلام ورديـه
لأن المرض بيننا والظلـم ونْباحـه
ينهش بعرض العرب والحالة شْقيّه
واحنا ملكنا دروع الشعر و رْماحـه
يفزع قلمنا .. يوقف جانب خْويّـه
لاتلوموا قلب ومشاعر حيل ذباحـه
الله خلقني وانا مـا دامنـي حيّـه
اعيش فجر القصيد اشراقة صْباحـه
أصعد جبال الشعر ودروب نجميّـه
لني وفية وفيني طيـب وسْماحـه
فيني شموخ ٍ وقلبي طيـب النيـه
والختم مني لكـم أزهـار فوّاحـه
ومن قصيدي زهور الحـب معطيّـه
شعر : برديس فرسان خليفة
