عندما نقرأها .. نعرف أنها لا تكتب من الفراغ أبدا .. أمل المرزوق في نص يمثل الجمال ..
(1)
يحتاج لك:
بعضي وكلي،
يحتاج لك:
ذاتي وظلي،
يحتاج لك:
دمعي وحزني والأسى ..
أحتاج قلبك وأعشقه
أحتاج له .. اللي نسى
واللي قسى،
واللي يبعثر لي بغروره
مجمل أوقات المسا،
أحتاج لك ..
(2)
واستعمرك،
وأزرع بخصب شعورك أمجادي،
وأعزف أنا بناي الأمل
نوته عليها انكتب:
(تاريخ ميلادي)
وأذكر طفولة إكبرت !
وأذكر بقايا أثر، من ماضي أجدادي ..
وأسترجع الذكرى لجل/
أسرد حكايات "السجن .. وعيون أصفادي"
واستعمرك،
وأثري أنا مـ استعمرك،
لكن أحاول أبتعد
وأطلب اعتاقي ..
وأطلب أنا حريتي،
لجل أعشقك ،
وأنا أدري انه ما يصير .. أعشق بيومٍ
شيخ أسيادي !
(3)
قلبك قبيله .. سيدّي
والنبض من حولك (عبيد)
آه يا (شيخي) العنيد
يا بقايا أمنياتي
يا شظايا ذكرياتي،
أدري إنْ باسك شديد
(4)
حبيبي إعذر حروفي،
وإعذر أيضاً التعبير .
لأن (الليل) يا قلبي
غدر فيني وضيعني..
تصدق؟ ماقدر يسمع
عجز يتحمل شعوري،
وسلَم همي للأنوار
تعب ليلي وهو يسمع،
حديثي عن بقايا حب:
سوالفنا
وضحكتنا
زوايانا وجمعتنا،
هذيك الطاولة والدار
تعب ليلي وهو يسمع،
حكاية قهوة الأحباب !
أسولف له عن القهوه
هذيك القهوة الحلوه
وعن سكَر علاقتنا
أسولف له عن اللي غاب
(5)
ومنهو غاب يا كلي؟
قطع درب الهوى فيني
قطع أغلى شراييني
وبعد ما ماتت عروقي،
رتل سورة "الأحزاب" .
توضأتك طهر عاطر،
وصليت بشموخ الدين.
دعيت الله وأنا أسجد:
يا ربي إحفظه دايم
وعطه اللي يبيه وزود،
ياربي فرح قليبه
وحفظه من حسود العين
شعر : أمل المرزوق - مملكة البحرين ..
