عشق المـا... / ماجد سليمان ..

للشعر روح أخرى عند ماجد بن سليمان ... نهديكم .. إبداع خاص نعتبره من خصوصيات الشاعر :

عشقتك والضلوع احطام ..
عطشتك والعَطَش ظَلّام ..
وأنا ما في يدي يا كود ..
قلبٍ فالهوى محسود ..       ولا به زود ..
إلا ذابل عروقه ..       وحَطَب شوقه ..      
على هونك ..       جَلَبت إلك السهر تحنان ..
وجَلَبت من القصيد اسمان ..
ومن بيد الشقا أقبلت ..       بسرجٍ منقطع وعنان ..
عشقتك لين ..        أفناني الغرام وجاير الميعاد ..
عشقتك لين ..        أضناني السكوت وحزني المعتاد ..
كفاك عْنَاد ..      أنا في عَتمة الفرقى ..
أدَوّر وجهك الوَقَّاد ..
كفاك عْنَاد ..
عشقتك بس ما كَفَّى ..       شريد وعينك الملفى ..
طريح وغيبتك شَلْفَا ..
يا وين ألقاك ..       يا وجه الصباح ولَمَّة الخلان ..
يا غصن الراك ..       عسى لقياك ..
تفتح للوصل شباك ..
سلام الله ..      يا كحل الليال وفَزَّة الغدران ..
سلام الله ..       يا دم الشجون وصادق الأحلام ..
أنا ما انلام ..       إذا نسنس جفاك وطاح ..
قلبي من الضلوع وناح ..
يفيض الوجد من يَمْك ..       وصدري بالوَلَه فَوّاح ..
من البارح ..       وطيوفك هم ضْيوفي ..
دفى البارح ..       يذَكّرني عِنَب لقياك ..
يذَكّرني جمر فرقاك ..       عجزت أنساك ..
ولا بي عرقٍ بيروى ..       وهو يضماك ..
ألا يا ما أعذب طيوفك ..       ألا يا ما ألطف سيوفك ..
هلا من وين ما تشرق ..       يا أول وآخر أحبابي ..
غلا من حيث ما تبرق ..       شفاك ويهوي اشهابي ..
إلين اليوم ..
وأنا أسمع رَنَّة حْجولك ..
إلين اليوم ..
وأنا أسري فْليل مجدولك ..
على الله يالغصين الهَشْ ..       إذا مَيَّل بك المسرى ..
تبي تلقى الهدب لك عشْ ..
وتلقى في فؤادي عرشْ ..
عشقتك وأنت عشق الما ..
سحابٍ خَالك المضما ..       أمرْ وبالجفا تهما ..
جزاك الله ..       يا طاغي البها ومجَعَّد المجدول ..
جزاك الله ..       يا ظلم الشفاه ويا ابتسام اللول ..
قتيلك طاح ..
من سهم العيون وخَدّك الفَوَّاح ..
قتيلك طاح ..
ولا رَفْرَف حَمَام فجثّته أو ناح ..
وداع إن كان تذكرني ..
يا خلْ فيوم خَيَّرني ..
ما بين الموت والمرواح ..
وداع إن كان تذكرني ..

شعر: ماجد سليمان