إحساسنا المكسور ! / جمعان وقيان

مسا الخير ولا يا مسا إحساسنا المكسور ..
مسا العز ولا يا مسا الذل وشعوره ..
مسا الحق ولا يا مسا صوتنا المقهور ..
على حالنا اللي يوجع الماضي حضوره ..
الا يا امة التوحيد زاد الخطا والجور ..
وحنا مثل من قطع الخوف حنجوره ..
من المركز الاول الى آخر الطابور ..
على كثرنا صرنا البراويز والصوره ..
متى مالنا غير المتى والقلوب قبور  ..
كثير التمني ما حيا روح مقبوره ..
فلسطين راحت والسبايب وعد بلفور ..
ولا حركت فينا الخديعه سوى ثوره ..
خطابات رنانه رجال ونسا جمهور ..
وحرق العلم موضه وكلن خذى دوره ..
ترى هكذا ما تورد الابل يا اهل الشور ..
ولا هكذا نسترجع المجد وعصوره ..
مدام إتباع الدين بصدورنا مبتور ..
فلا هي غريبه هيبة الدين مبتوره ..
تمادوا علينا لين صرنا بدون شعور ..
غدى شغلنا الشاغل عرى الفن والكوره ..
وش اللي بقى ما صار فينا عشان انثور ..
خذينا من اشكال المهونه كذا دوره ..
الين المهازل وصلت حدها المحظور ..
على المهدي اللي كسر الظلم وشروره ..
خطوا فيك ياللي مولدك للخلايق نور ..
خطوا فيك وانت الجهل حطمت ديجوره ..
خطوا فيك وانت الصادق ولا نطقت بزور ..
خطوا فيك وانت الشرك بعثرت جمهوره ..
خطوا بالامين المؤتمن في عظيم الدور ..
وهو من غرس للدين دعواه وبذوره ..
خطوا والخطا ما حرك امن الشجر عصفور ..
تهاوت هممنا والعدو  بين سروره ..
كفايه مسانا ضاق باحساسنا المكسور ..
كفايه نبيح الضعف ونبرر حضوره ..

شعر : جمعان الوقيان