كأن الارض كذبة فوقها الرجلين
كأني وحدي المبعوث من بدري !!
هنا , نتنفس الكثير من الشعر في هذا الشاعر الذي أهدانا هذا النص الحصري ليكون بداية التحليق
في فضاءات الشعر والحرف , فهد دوحان الإسم الذي يبحث عنه الكثير من محبي الشعر الحقيقي ..
يهدينا جزء من روحه في هذا النص .. ليلامس فيه أرواح محبيه عبر أنهآره ..
حزين لحد ماني عارف احزن وين
عليك احزن على روحي على مدري !!
ابقطع هالشجر واجلس برمله لين
يطيح آخر غصوني وانبت بصبري !
خطاي اجمل ذنوبي : تعرفه بعدين
وساعتها تشوف النــاسك العذري !
على ( تدري فهد ) كنت ابني من الطين
قصور ، وطاح فيها انسان ماتدري !!
ضحكت وكانت الضحكة تعيدك بين
أعيشك واكتب الباقي لك بشعري
مهو، ترتيب بيت وبعدها بيتين
قوافي ، باهته يطفي بها جمري
ولا اوزان يشبه بردها السكين
تقطـَّع فوقها حزني مثل عذري !
ابكتب كيف احبك كيف اعيش الحين
اذا تطري وتشوف شلون بي تطري
كأن الارض كذبة فوقها الرجلين
كأني وحدي المبعوث من بدري !!
ذنوبي انت وحْسابي معك بعدين
اذا شفتك : وضميتك على صدري
ابسكت واترك الباقي واشيله دين
اسدد ما بقى لك أوعسى هجري :
يفسر ليه ما اقدر أمد إيديـن
وانا محتاج لك يا العابر بعمري
ابيـك وانت ضحكة روحي من سنين
ولكنـي حزيـن لحــد ما أدري !!
شعر : فهد دوحان
