بروح الشعر تأتي شاعرتنا مها اليعقوبي لتهدينا الحياة والشعر ..
نص متزن يحمل الكثير من الإحساس والألق :
الحب حرب ٍ بين اعضاء وشجون
والذات ارض بها معارك وخيمه
..
اقوى جنودي دايم قـْتاله جْنون
شوقي/ وزعلك لشتياقي غريمه
..
إرماح عينك صوبن فيني طعون
ما ظن هالطعنات جتني سليمه
..
سيف المعاتب منك ذا سيف مسنون
شهّر سيوف ٍ في عتابي حليمه
..
عندي عتابك يا هنا فوادي مزون
كني صحارى صادفت منك غيمه
..
لأن المعاتب في رفيعات لشؤون
ولاّ ظنونك في حقوقي ظليمه
..
عسْكر فـ قلبي يا هوى البال بالهون
زادك غرامي ولْك هالعين خيمه
..
بيّت فـ عيني لجل اغطيك بجفون
والشوق حارس في ليالي عتيمه
..
ظنيت قلبي عون لي صار فرعون
ما بان في قلبي لهجرك عزيمه
..
صار النصر في صالحك شي مضمون
الارض ارضك والنتيجه هزيمه
..
حرّه انا واتأمل فـ قيد وسجون
ان كنت سجاني فخذني غنيمه
..
العشق للاحرار له سرّ مكنون
وشلون يغدي العشق خصله ذميمه؟!
شعر : مها اليعقوبي
