العفوية ، القيمة في النص، جمال العادات، يرسمها شاعرنا مشل الغازي في قصيدة غارقة بالاصالة…
الشعر ندعيه ويلبي دعانا
والمعاني ماتكون الا عظيمه
عن خبرنا يامدور مبتدانا
النوايا من عرفناها سليمه
ماتبوق العين من بيت اقصرانا
لاغفّل شايبهم وخلا حريمه
حشمة البيت القريّب من حدانا
ما نظرنا فيه بالعين الاثيمه
لو نظرنا ننظر بمبدأ ربانا
نظرةً من دونها ستر وحشيمه
مانخاف الناس لكن من حيانا
ما نلد العين بالبنت الكريمه
العفيفه نحسبه بنتٍ لآبانا
واليتيمه عندنا ماهي يتيمه
ضحكنا من ضحكها وبكيه بكانا
في ذرانا دالهه منهو يضيمه ؟
امي توصي في محتاجٍ لفانا
ما سمعنا في مجالسها نميمه
حاشمين نفوسنا والله هدانا
للطبايع والتقاليد القويمه
من طناخة روسنا نعطي عشانا
ونتعشى جوع ونحسه وليمه
والغشيم اللي حدوه وابتلانا
مايذوق الا مرارات الهزيمه
ليّنين لكل من يكرم لحانا
ومن يشب النار ما حنا هشيمه
الشاعر : مشل الغازي
