بـ عيد ميلادي – الشاعرة : أشواق الخليفة – الكويت

الشاعرة الجميلة أشواق الخليفة في نص يعانق السماء كعادتها ….

عشان الليل ماخلا ملامح للبكا والتيه

اشوف الوضع رغم اللي حصلّي عادي وهادي ،

ضحكت من القهر ولاّ بكيت من السعادة .. ليه ؟

ابرر للبشر منهو حرمني نومي وزادي ..

حبيبي .. ماحدٍ غيرك احبه واعشقه واغليه

تطمن .. لو ربيع العمر في تلويحتك  غادي

معاك اللي هزم نفسه عشانك وانمسح ماضيه ..

ومد ايديه لمصافح يدينك والوله بادي ..

و راح بعيييييييد لك ..

أبعد ..

بعيد …

ومادريت شفيه ؟

على كثر البكا صارت دموعه عادة .. وعادي ..

هقى بك والهقاوي ماترجّع غالي لغاليه ..

ولا لبيهك تداوي جروح منادي يْنادي ..

عليك من الحسايف والأسف والتضحية و الْـ اييييييه ..

كلامٍ قاصرٍ دون الشعور وشرهة بْعادي..

وعذرك .. لو نبي نشوفه عذر ونحاول نراعيه

بيجرحني كُبر جرح الغياب بعيد ميلادي ..

شعر : أشواق الخليفة – الكويت