ثلاثينك … / الشاعر : يوسف ابن جريبيع

يقولون عامٍ جد وش عندك من احلام
و انا اقول حلم العام الاول ما حققته

جميل حضور الشعر والاجمل حضور شاعر بحجم يوسف بن جريبيع في نص غارق بالعذوبة ، لغة وتفاصيل تؤكد أنك تقرأ قصيدة لرسام شعر ….

على الله ثلاثينك تحث الخطا قدام
فهقت اليقين و قدمك الغيب و اروقته

يقولون عامٍ جد وش عندك من احلام
و انا اقول حلم العام الاول ما حققته

تزينين ولا ما تزينين يا الايام
هذا دفتر الماضي وهذيك محرقته

ليا ضاقت بعيني لقيت الطريق العام
يقول الزمن قدام و الناس لاحقته

انا المسلم اللي يضبط اخلاقه الاسلام
بعد ما سمعت بقصة ايوب صدقته

الي غايةٍ فالنفس عجزوبها الحكام
ليا من سمعها راعي الجاه ضايقته

دعيت الله اكبر يوم شفت الكبار اقزام
يطيح الكلام و ينهض الفعل و اطرقته

على جهدي المبذول والا بدعى والهام
ما خليتها يا رب للحظ و اصدقته

ليا ردها الواقع و حط الظنون اوهام
عليها الخيال ان مد لي يد عانقته

اذا ماهي بخيره عسى خيرتي قدام
تدف اليقين و تقطع الغيب واروقته

شعر : يوسف ابن جريبيع